உயரத்தில் ஏறத் தடை ஏதும் இல்லா இன்றைய உலகம்! -2
ச.நாகராஜன்

“ஒவ்வொரு நாளும் ஒவ்வொருவருக்கும் வாய்ப்புகள் இருந்து கொண்டே இருக்கின்றன. நீங்கள் விழிப்புடன் இருக்க வேண்டும். அதைப் பயன்படுத்திச் செயல்படத் தயாராக இருக்க வேண்டும், அவ்வளவு தான்!” – மார்க் ஆஸ்ட்ரோஃப்ஸ்கி
இந்தியாவிலிருந்து, குறிப்பாக சென்னை, பங்களூரு, ஹைதராபாத் ஆகிய நகரங்களிலிருந்து அமெரிக்காவிற்குச் செல்லும் மென்பொருள் பொறியாளர்கள் தங்கள் அபார மூளையால் பல்வேறு விதமான மென்பொருள்களை ‘ஸ்டார்ட் அப் கம்பெனி’ எனப்படும் சிறு கம்பெனிகளை ஆரம்பித்து சிருஷ்டிக்கின்றனர். அவை நன்கு வெற்றி அடைந்தவுடன் மிகப் பெரும் கம்பெனிகள் அந்தக் கண்டுபிடிப்புகளை நல்ல விலை கொடுத்து வாங்கிக் கொள்கின்றன. நல்ல பணத்தை தங்களின் இளமைக் காலத்திலேயே பார்க்க முடியும் இவர்களின் அறிவுத் திறனை அறிவியல் உலகம் பாராட்டுகிறது. எல்லோராலும் சாதிக்க முடியும் என்று கண் எதிரேயே நிரூபிக்கும் இந்த இளைஞர்களைக் கண்டு வியக்காமல் இருக்க முடியாது.
இவர்களைப் போல இந்தியர்கள் அனைவரும் ஆக முடியும்! எல்லாத் துறையிலும் உலகளாவிய விதத்தில் இந்த வெற்றிக்கான வாய்ப்பு இருக்கிறது என்பதை நிரூபிக்க இன்னும் சில சாதனையாளர்களைப் பார்ப்போம்:-
ஓப்ரா வின்ஃப்ரே
இன்று அமெரிக்க தொலைக்காட்சியில் ஓப்ரா வின்ஃப்ரே பற்றித் தெரியாதவர் இருக்க முடியாது. அவர் தனது இளமைக் காலத்தில் ஆறு வருடங்கள் தன் பாட்டியுடன் வாழ நேர்ந்தது. மிக்க ஏழ்மையான சூழ்நிலையில் உருளைக்கிழங்குகளை பாக் செய்து வரும் சாக்குகளினால் ஆன உடைகளையே அவர் அணிந்தார். அவரது குடும்பத்தைச் சேர்ந்த இருவர்களாலும் ஒரு நண்பராலும் பாலியல் கொடுமைக்கு ஆளாக்கப்பட்ட பின்னர் தனது 13ஆம் வயதில் வீட்டை விட்டு ஓடிப் போனார். 14ஆம் வயதில் அவருக்குப் பிறந்த ஆண் குழந்தை பிறந்தவுடன் இறந்து விட்டது. பிறகு அவர் தன் தாயுடன் வசிக்கச் சென்றார்.ஆனால் அம்மாவோ அவரை தந்தையடன் வசிக்க அனுப்பி வைத்தார்.
அதனால் அவரது வாழ்க்கையில் ஒரு மாறுதல் ஏற்பட்டது. கல்லூரிக்கு படிக்கச் சென்றார். அங்கு ஒரு அழகிப் போட்டியில் பரிசைப் பெற்றார். ஒரு ரேடியோ ஸ்டேஷன் அவரை ஆதரிக்க ஆரம்பித்தது. அப்போது தான் அவருக்குத் தன் திறமையே தெரிய வந்தது. பேட்டிகளை எடுக்க ஆரம்பித்தார். பின்னர் நடந்ததை உலகம் அறியும். இன்று உலகின் நம்பர் ஒன் ஷோ ஓப்ரா வின்ஃப்ரே ஷோ! அவரது இன்றைய சொத்தின் மதிப்பு 270 கோடி அமெரிக்க டாலர்கள்!
வால் மார்ட் கண்ட சாம் வால்டன்
அமெரிக்காவில் ஓக்லஹாமாவில் பயங்கரமான பொருளாதார வீழ்ச்சியின் போது வால்டன் என்ற ஏழ்மைக் குடும்பம் தவியாய்த் தவித்தது. அன்றாட செலவுகளுக்குப் பணம் வேண்டுமே! வால்டன் பசுமாட்டின் பாலைக் கறக்க ஆரம்பித்தார். கறந்த பாலை வாடிக்கையாளர்களுக்கு ‘டோர்-டெலிவரி’ செய்தார். அன்றாடம் பேப்பர் படிப்பவர்களுக்கும் நாளிதழ்களையும் இதர பத்திரிக்கைகளையும் போட்டு அதில் வரும் வருமானத்தையும் வைத்து செலவுகளை ஒருவழியாய்ச் சமாளித்தார்.
வால்டன் தனது 26ஆம் வயதில் மிசௌரி பல்கலைக் கழகத்தில் பொருளாதாரத்தில் பி.ஏ.படிப்பை முடித்து ஒரு வெரைட்டி ஸ்டோரை ஆரம்பித்தார்.அர்கான்ஸாஸில் உள்ள அந்த ஸ்டோரை 5000 டாலர் ராணுவத்திலிருந்து வந்த பணத்தையும் 20000 டாலர் வங்கி கடனையும் வைத்து வாங்கினார். கடுமையான உழைப்பின் மூலம் ஒரு கடையை இரண்டாக விஸ்தரித்தார். இரண்டை ஒரு சங்கிலித் தொடர் வரிசைக் கடைகளாக்கினார். அது வால்மார்ட் என்று பிரசித்தம் அடைந்தது. இன்று வால்மார்ட் கடைகளைப் பார்ப்பவர் வாயைத் திறந்து பிரமிக்கின்றனர். அவ்வளவு பிரம்மாண்டம்! 1992இல் அவர் இறந்தார். மனைவி மற்றும் குழந்தைகளுக்கு வால்மார்ட் உரிமையானது. இன்று வால்மார்ட்டை அறியாதோர் இல்லை!

ரிச்சர்ட் டெஸ்மாண்டின் காரேஜ் வாழ்க்கை
ரிச்சர்ட் டெஸ்மாண்ட், பெற்றோர் விவாகரத்து செய்யவே தாயிடம் வளர ஆரம்பித்த ஒரு குழந்தை! தாயும் மகனும் ஒரு காரேஜில் தான் வாழ முடிந்தது. 14ஆம் வயதில் அவர் பள்ளிப்படிப்பை விட்டார். ஒரு ட்ரம்மராக வாழ்க்கையை ஆரம்பித்தார்.சின்ன சின்ன வேலைகளைச் செய்தார். இசையில் பெரிய விற்பன்னராக இல்லாவிட்டாலும் கூட, பின்னால் மெதுவாக ரிகார்டு செய்யும் கடைகளை ஆரம்பித்தார். பின்னர் இசை சம்பந்தமாக இரு பத்திரிக்கைகளை ஆரம்பித்தார். அவர் புகழ் பரவ ஆரம்பித்தது. பிரிட்டனைச் சேர்ந்த பெண்ட்ஹவுஸ் மற்றும் ஓகே போன்ற பிரபல பத்திரிக்கைகளைப் போல புகழ் படைத்த பத்திரிகைகளை அவர் நடத்த ஆரம்பித்தார். அத்தோடு தனக்கு வந்த வருமானத்தில் ஒரு பகுதியை நல்ல காரியங்களுக்கு ஈந்து பெரும் நன்கொடையாளராகவும் ஆனார்.
சன் க்ளாஸ் தயாரித்த லியனார்டோ டெல் வெச்சியோ
தாயோ விதவை. நான்கு குழந்தைகளை வளர்க்க முடியாமல் சிரமப்பட்டார். நான்கு குழந்தைகளில் ஒன்றான லியனார்டோ டெல் வெச்சியோ அனாதை இல்லத்தில் வளர்ந்தார். காரின் பாகங்களைத் தயாரிக்கும் மோல்டுகளைச் செய்யும் தொழிலகத்தில் சேர்ந்தார். அத்தோடு கண்ணாடி ப்ரேம்களைச் செய்யவும் கற்றுக் கொண்டார். ஆனால் அதில் ஒரு விரலே போனது.
23ஆம் வயதில் கற்ற கலையை வைத்து சொந்தமாக ஒரு மோல்ட் ஷாப்பை ஆரம்பித்தார். கண்ணாடி ப்ரேம்களில் சன் க்ளாஸ்களை அமைத்தார். உலகப் புகழ் பெற்றார், ரே- பன், ஓக்லி போன்ற முத்திரை பெற்ற ப்ராண்ட் வகைகளைத் தயாரிக்க ஆரம்பித்தார். லக்ஸோடிகா என்ற அவரது நிறுவனம் விரிவடைந்தது. இன்று ஆறாயிரம் கிளைகளுடன் 1150 கோடி டாலர்களுக்கு அவர் அதிபதி!
இது போல இன்னும் நூற்றுக்கணக்கானவர்களின் உண்மை சரிதங்களை எடுத்துக் காட்ட முடியம், இன்றைய அறிவியல் உலகில்!
சோம்பேறிகளுக்கு இல்லை வெற்றி! கடுமையான உழைப்புடன் மக்களின் தேவைக்கு ஏற்றபடி தங்கள் மனச் சித்திரத்தில் உதித்த சேவைப் பொருள்களை ஆக்கபூர்வமான படைப்பாற்றலைக் குழைத்து சமூகத்திற்குப் படைக்கும் அனவருமே இன்று வெற்றியாளர்கள் தான்!
இதற்கான அடிப்படைக் காரணம் அறிவியல் உலகம் கட்டற்ற வாய்ப்புகளை அவிழ்த்து விட்டிருப்பதே ஆகும்!

Pic Source : https://cdn.yourstory.com/wp-content/uploads/2016/09/oprah.png

உயரத்தில் ஏறத் தடை ஏதும் இல்லா இன்றைய உலகம்! -1
ச.நாகராஜன்

“ஒரு மனிதரின் மனதையும் இதயத்தையும் புரிந்து கொள்ள அவர் இதுவரை என்ன சாதித்திருக்கிறார் என்று பார்க்காதே! அவர் என்னவாகவிரும்புகிறார் என்பதை அறி!” – கலில் ஜிப்ரான்
அறிவியல் முன்னேற முன்னேற வெற்றிக்கான வரம்பு எல்லையற்று விரிந்து விட்டது!
யார் வேண்டுமானாலும் முன்னேறலாம். வானமும் எல்லை இல்லை. எந்த உயரத்திலும் ஏறி வெற்றிக் கொடி நாட்டலாம். அது தான் இன்றையஅறிவியல் உலகம்.
ஆதாரம் வேண்டுமா? இதோ கீழே தரப்படுபவர்களைப் பற்றிப் படியுங்கள். உற்சாகம் அடையலாம்.உத்வேகம் பெறலாம். அது சரியில்லை; இதுசரியில்லை என்று சாக்கு போக்கு சொல்லாமல் உங்கள் லட்சியத்தை நோக்கி முன்னேறி வெற்றி பெறலாம்.
உத்வேகமூட்டும் சில உண்மை வரலாறுகள் இதோ, உங்களுக்காகவே!
மரியா தாஸ் க்ரகாஸ் சில்வா ஃபாஸ்டர்
பிரேஜிலில் உள்ள மிகப் பெரிய எண்ணெய் நிறுவனம் பெட்ரோப்ராஸ். இதனுடைய தலைமைப் பொறுப்பை முதன் முதலாக ஒரு பெண்மணிஏற்றுள்ளார். உலகமே வியக்கிறது இன்று! மரியா தாஸ் க்ரகாஸ் சில்வா ஃபாஸ்டர் என்ற அந்தப் பெண்மணி சாதனை படைத்து விட்டார். மொரோடொ ஏடியஸ் என்ற ஊரில் தன் இளமைப் பருவத்தைத் தொடங்கினார் மரியா. மிக மிக ஏழ்மையான குடும்பம். அம்மா கடும் உழைப்பாளி. அப்பாகுடிகாரர். வேறு வழியின்றி சாலையில் குப்பையோடு கிடக்கும் கேன்களையும் பேப்பர்களையும் பொறுக்கித் திரட்டி சிறிது பணத்தைச் சம்பாதித்துவந்தார் மரியா.
1978ஆம் ஆண்டு ஆரம்ப பயிற்சியாளராக பெட்ரோப்ராஸ் நிறுவனத்தில் சேர்ந்தார். கடுமையான உழைப்பு. எதையும் எதிர்கொள்ளும் திறன். எல்லாதடைகளையும் உடைத்தெறிந்தார் மரியா. முதன் முதலாக CEO எனப்படும் தலைமைப் பொறுப்பு அதிகாரியாக சமீபத்தில் பதவி ஏற்றார்.
நிறுவனங்களைப் பற்றி மதிப்பிடும் உலகின் தலையாய நிறுவனமான ப்ளூம்பெர்க் மரியாவைப் பற்றிய தனது மதிப்பீட்டை வெளியிட்டுள்ளது.அவரது ஓய்வில்லாத கடும் உழைப்பே அவரை இந்த உயர் நிலைக்குக் கொண்டு வந்துள்ளது என்கிறது ப்ளூம்பெர்க். அவரது வேலை செய்யும் பண்புஅவருக்கு கவைரோ என்ற பட்டப் பெயரை நிறுவனத்தில் சம்பாதித்துக் கொடுத்தது. கவைரோ என்பது கிரிமினல்கள் நிறைந்த ப்ரேஜில் நகர்களில்அவர்களை அப்புறப்படுத்த ப்ரேஜில் போலீசார் உபயோகப்படுத்திய போலீஸ் வாகனத்தின் பெயர்! பிப்ரவரி, 2015இல் அவர் சிஇஓ ஆனதற்குஉலகமே வாழ்த்துத் தெரிவித்தது.
மூன்று வேலை பார்த்து கஷ்டப்பட்ட டு வான் சாங்
1981ஆம் ஆண்டு கொரியாவிலிருந்து ஒரு இளம் தம்பதிகள் அமெரிக்காவிற்கு இடம் பெயர்ந்தனர். இளம் மனிதரின் பெயர் டு வான் சாங்.மனைவியின் பெயர் ஜின் சூக். அமெரிக்காவிற்கு வந்த புதிதில் வாழ்க்கைச் செலவை ஈடுகட்டுவதற்காக டு வான் சாங் ஒரே சமயத்தில் மூன்றுவேலைகளைப் பார்த்தார். ஒரு காபி ஷாப்பிலும். ஒரு பெட்ரோல் பங்கில் பணியாளாகவும், ஒரு கட்டிடத்தில் காவல் காப்பவராகவும் இப்படி ஒரேசமயத்தில் மூன்று வேலைகளையும் பார்த்து பணம் சம்பாதித்த அவர் 1984ஆம் ஆண்டு ஒரு துணிக்கடையை ஆரம்பித்தார்.
அந்த ஒரே துணிக்கடை Forever 21 என்று இப்போது உலகப் புகழ் பெற்றுள்ள நிறுவனத்தை ஆரம்பிக்க வழி கோலியது. இப்போது 480ஸ்டோர்களுடன் ஆண்டு ஒன்றுக்கு 300 கோடி டாலர் வருமானத்தை ஈட்டுகிறது. இதை தனது குடும்ப வர்த்தகமாக மட்டுமே நடத்துகிறார் டு வான்சாங். அவரது மகள்களான லிண்டா மற்றும் எஸ்தர் இப்போது தந்தைக்கு உதவியாக வணிகத்தை போட்டி போட்டுக் கொண்டு வளர்க்கிறார்கள். டுவானின் சாதனைக்குக் காரணமும் கடும் உழைப்பே தான்!
இருட்டறை காபினில் வாழ்க்கையைத் துவங்கிய ஹரால்ட் சிம்மன்ஸ்
இன்று பல கோடி டாலர்களுக்கு உரியவர். அன்றோ சிறிய காபின் ஒன்றில் வாழ்ந்தவர். பெயர் – ஹரால்ட் சிம்மன்ஸ். டெக்ஸாஸில் கோல்டன் நகரில்மின்சாரமும் குழாயுமின்றி இருந்த ஒரு இருட்டறையில் அவர் தன் ஆரம்ப கால நாட்களைக் கழித்தார். இருந்தாலும் மனம் தளரவில்லை.நம்பிக்கையை இழக்கவில்லை. பல்கலைக் கழகத்தில் சேர்ந்து பி.ஏ. படிப்பை முடித்தார்.பின்னர் பொருளாதாரத்தில் மாஸ்டர் பட்டமும் பெற்றார்.
முதல் முயற்சியாக பல மருந்துக்கடைகளின் சங்கிலித் தொடர் ஒன்றை கடன் வாங்கிய பணத்தை வைத்து ஆரம்பித்தார். அது இன்று 100ஸ்டோர்களை உடைய சங்கிலித் தொடர் கடைகளாகப் பரிமளிக்கிறது. அந்தக் கடைகளை எகெர்ட் என்ற பெரும் நிறுவனத்திற்கு 5 கோடிடாலர்களுக்கு விற்றார். அவ்வளவு தான், கையில் கிடைத்த பணத்தை வைத்து பிரம்மாண்டமான கார்பொரேட் ஜெயண்ட் ஆகி விட்டார். இப்போதுஆறு கம்பெனிகளுக்கு உரிமையாளர். அதில் ஒன்று டைட்டானியம் மெடல்ஸ் கார்பொரேஷன் என்ற பெரிய நிறுவனமும் ஒன்று. இந்த நிறுவனம்தான் உலகிலேயே மிக விலைமதிப்புள்ள டைட்டானியத்தை உற்பத்தி செய்யும் மிகப் பெரிய நிறுவனம்.
ஆக அறிவியல் உலகம் இன்று அனைத்துத் தரப்பு மக்களுக்கும் ஆதரவாக எல்லையற்ற சாத்தியங்களைத் திறந்து விட்டிருக்கிறது.
ஆசையும், லட்சியமும் அதற்கேற்ற உழைமப்பும் இருக்கிறதா, வெற்றி நிச்சயம் தான்

Pic Source :http://www.topnews.in/files/Petrobras.jpg

இயற்கையில் கணித இரகசியம் ! – 3

 ச.நாகராஜன்

             “எல்லாமே எண்கள் தான்!”

                                -பிதகோரஸ்

இயற்கையில் உள்ள கணித ரகசியங்களையும் வடிவமைப்பு ரகசியங்களையும் கண்டுபிடிக்க விஞ்ஞானியாகத் தான் இருக்க வேண்டும் என்பது கட்டாயமில்லை. ஐன்ஸ்டீன் ஒளியின் வேகத்தைக் கண்டுபிடிக்க ஒளியின் மீது ஏறிச் செல்வது போலக் கற்பனை செய்து அதைக் கண்டு பிடித்தார். ஆனால் சாமானியராக இருந்த பலரும் கணித ரகசியங்களைக் கண்டுபிடித்துள்ளனர்.

எடுத்துக்காட்டாக ‘குட் வில் ஹண்டிங்’ (Good Will Hunting) என்ற ஆங்கிலத் திரைப்படத்தில் வரும் கதாநாயகனான வில் ஹண்டிங் என்ற இருபது வயது இளைஞனைக் கூறலாம். இந்த ஆங்கிலப் படம் உண்மைச் சம்பவத்தை அடிப்படையாகக் கொண்டது. உள்ளூர் மதுபானக் கடையில் வேலை பார்த்து வந்த ஹண்டிங் மிகப் பெரும் மேதைகளாக இருந்த கணிதப் பேராசிரியர்களால் தீர்க்க முடியாத கணிதப் பிரச்சினைகளை அனாயாசமாக தீர்த்து விடுவான்.

ஆயிரத்து தொள்ளாயிரத்து எழுபதுகளில் அமெரிக்காவில் சாண்டியாகோவில் வாழ்ந்தவர் ஐந்து குழந்தைகளுக்குத் தாயாரான பெண்மணி மர்ஜோரி ரைஸ். அவர் கணிதப் பேராசிரியர்கள் கண்டுபிடிக்கவே முடியாது என்று நினைத்த ஜாமெட்ரி வடிவங்களை இல்லத்தில் இருந்தபடியே கண்டுபிடித்து அனைவரையும் பிரமிக்க வைத்தார். 1976இல் அவர் இப்படி 58 விசேஷ வடிவங்களை அமைத்துக் காட்டினார்.

1998ஆம் ஆண்டு கல்லூரி மாணவரான ரோலண்ட் க்ளார்க்ஸன் என்பவர் மிகப் பெரும் பிரைம் எண்ணை – பகா எண்ணைக் கண்டு பிடித்தார். (பகா எண் என்பது ஒன்றாலும் அதே எண்ணினாலும் மட்டுமே வகுக்கக் கூடிய ஒரு எண். உதாரணமாக 11 என்ற எண்ணை ஒன்றாலும் அதே பதினொன்றாலும் மட்டுமே வகுக்க முடியும்) இப்போது புதுப் புது பிரைம் நம்பர்களைப் பெரும்பாலும் கல்லூரி மாணவர்களே கண்டுபிடிக்கின்றனர்!

கயாஸ் எனப்படும் குழப்பம் அல்லது சீரற்ற தன்மை பற்றிய கயாஸ் தியரி என்று ஒன்று உண்டு. இந்த குழப்பத்திலும் கூட ஒரு ஒழுங்கு இருக்கிறது என்பதை இப்போது கண்டு பிடித்துள்ளனர்.

வானத்தில் உள்ள மேகக் கூட்டங்கள் வெவ்வேறு வடிவத்திலும் அளவுகளிலும் சீரற்ற தன்மையில் இருப்பது போல நம் கண்களுக்குத் தோன்றினாலும் அதை உயர்த்திலிருந்து பார்க்கும் போது அதிலும் ஒரு ஒழுங்கு, லயம் இருப்பதைப் பார்த்து விஞ்ஞானிகள் பிரமிக்கின்றனர்.

இப்படி கணித மர்மங்களை ஏன் கண்டுபிடிக்க வேண்டும் என்பதை விஞ்ஞானிகள் விளக்குகின்றனர். முதலாவதாக பிரபஞ்சத்தில் உள்ள புதிர்கள் அனைத்திற்கும் விடைகளை கணித எண்களே தருகின்றன! பிரபஞ்சத்தில் உள்ள மர்மங்களைக் கண்டுபிடித்து விட்டால் நாளை என்ன நடக்கும் என்ற கணிப்பைச் சரியாகச் செய்ய முடியும். ஒரு விண்கல் நம் பூமியின் மீது மோத வருகிறது என்றால் அதைத் தடுக்கும் தற்காப்பு நடவடிக்கையிலும் ஈடுபட முடியும்.

அத்தோடு இந்த இயற்கை கணித ரகசியங்களைக் கண்டுபிடித்து விட்டால் மிக உயரிய நாகரிகத்தை அடைந்து வளமுடன் அனைவரும் வாழும் வழியையும் கண்டு பிடிக்கலாம்.

நமது முன்னோர்கள் இந்த அரிய ரகசியங்களைக் கண்டு பிடித்து அவற்றை யந்திரங்களாக மாற்றி வழிபட வழி வகுத்தனர்.ஸ்ரீ யந்திரம் என்பது பிரபஞ்ச  தத்துவத்தையும் ரகசியத்தையும் சிறு யந்திரத்தில் அடக்கிக் காண்பிக்கப்பட்ட வழியே என்றும் அதிக ஆற்றலைக் கொண்ட இந்த யந்திரத்தை இப்போது ‘டீ- கோட்’ செய்ய விஞ்ஞானிகள் முயல்கின்றனர் என்பதும் சுவையான செய்தி அல்லவா! நான்காம் தலைமுறை கணினி கூட ஸ்ரீயந்திரத்தின் சிக்கலான அமைப்பைக் கண்டுபிடிக்க முடியவில்லை இதுவரை!

பெயரில் உள்ள எழுத்துக்களுக்கும் எண்களுக்கும் உள்ள தொடர்பை முதலில் பிதகோரஸ் கூறினார் என நம்புகின்றனர். ஆனால் வடமொழியில் உள்ள கடபயாதி சங்க்யா என்ற முறை எதையும் கணித சூத்திரத்தில் அடக்கி விடும் ஒரு வழி முறையாகத் தொன்று தொட்டு நம் நாட்டில் இருந்து வருகிறது. பெயரில் உள்ள எழுத்துக்களுக்கும் எண்களுக்கும் உள்ள தொடர்பை -இந்த கடபயாதி வழிமுறை உள்ளிட்ட விஷயங்களை – பல சம்ஸ்கிருத நூல்கள் விளக்குகின்றன!எடுத்துக்காட்டாக ஆதி சங்கரரின் பெயரிலேயே அவர் பிறப்பு பற்றிய அனைத்து விவரங்களும் அமைந்துள்ளன. சம்-க-ர என்பதற்கு உரிய எண்களாக 5-1-2 ஆகியவை அமைகின்றன. கடபயாதி முறைப்படி இந்த எண்களைத் தலைகீழாகத் திருப்பிப் போட்டு விவரங்களை அறிய வேண்டும். அதன் படி இந்த எண்கள் 2-1-5 என்ற வரிசையில் மாற்றி அமைத்துப் பார்த்தால் 2 என்பது அவர் பிறந்த மாதமான வைகாசி மாதத்தையும் ஒன்று முதல் பக்ஷமான வளர்பிறையையும் ஐந்து என்பது அவர் பிறந்த திதியான பஞ்சமியையும் குறிக்கும். வைகாசி மாதம் சுக்லபட்சம் பஞ்சமியில் சங்கரர் அவதரித்தார் என இதன் மூலம் அறிய முடிகிறது.

மஹாபாரதத்தின் உண்மைப் பெயரான ஜய என்பதை 8-1 என்ற எண்கள் குறிக்கின்றன. இதை கடபயாதி முறைப்படி திருப்பிப் போட்டால் வருவது 18. ஆகவே பதினெட்டுப் பர்வங்களைக் கொண்ட இந்த நூலில் பதினெட்டு என்ற எண் முக்கியத்துவத்தைக் கொண்டதாக அமைக்கப்பட்டுள்ளதை அறிய முடிகிறது. இவை எளிய உதாரணங்கள். ஆனால் சிக்கலான பல மர்மங்களை இந்த முறைப்படி சம்ஸ்கிருத நூல்களில் மறைத்து வைத்துள்ளனர். இதை ஆராய்வோர் பிரமித்து மலைக்கின்றனர்.

பிரபஞ்சத்தில் உள்ள அனைத்து மர்மங்களையும் ஆராய்ந்து பார்த்து விட்டு, “எல்லாமே எண்கள் தான்” என்ற பிரபலமான தத்துவத்தைச் சொன்னார் பேரறிஞர் பிதகோரஸ். ஆனால் இதையே தொலைக்காட்சி, ரயில், கார் போன்ற நவீன வசதிகள் இல்லாத தமிழக குக்கிராமத்தைச் சேர்ந்த சாதாரண பாமரன் ஒருவன் “எல்லாம் ஒரு கணக்குத் தான்” என்று சர்வ சாதாரணமாகச் சொல்லும் போது பிரபஞ்சம் பற்றிய பேரறிவை அவனது அனுபவபூர்வமான வார்த்தைகளில் கண்டு பிரமிக்க வேண்டி இருக்கிறது! ஆராய்ந்து பார்த்தால் எல்லாமே எண்கள் தான்!!

Pic Source : https://www.thegreatcourses.com/media/catalog/product/cache/1/image/800×600/0f396e8a55728e79b48334e699243c07/1/4/1406—base_image_4.1424268494.jpg

அன்புடையீர்

கடந்த ஒரு ஆண்டு காலமாக வாரம் இரு தமிழ் கட்டுரைகளும் இரு ஆங்கிலக் கட்டுரைகளுமாக 208 கட்டுரைகளை நீங்கள் படித்து ஆதரித்ததற்கு எனது உளமார்ந்த நன்றியைத் தெரிவித்துக் கொள்கிறேன்.

திருநெல்வேலியிலிருந்து வெளிவரும் ஹெல்த்கேர் இதழின் ஆசிரியர் திரு ஆர்.சி.ராஜா   அவர்கள் கேட்டுக் கொண்டதற்கிணங்க இந்தப் பணியைச் செய்து வந்தேன்.

அன்பர் திரு. துஷான் குணபாலசிங்கம் இவற்றை அன்புடன் கடந்த ஒரு ஆண்டு காலம் வெளியிட்டு வந்தார்.

திரு ராஜா மற்றும் திரு குணபாலசிங்கம் அவர்களுக்கு என் மனமார்ந்த நன்றி.

இந்தத் தொடர்பு நீடிக்கும் வகையில் அவ்வப்பொழுது நாம் சந்திப்போம்.

அன்பன் ச.நாகராஜன்

********************************** ***

 

சந்தோஷம் அடைய எளியவழிகள்! – 2

.நாகராஜன்

இரு கரங்களையும் உயர்த்துங்கள்! இன்றையசந்தோஷத்திற்கு வரவேற்பை அளியுங்கள்” –யாரோ

  1. சந்தோஷத்திற்கும் இசைக்கும் நேரடித்தொடர்பு உண்டு. சோகமான கீதங்களைக்கேட்டாலும் கூட அது மெல்லிய உணர்வுகளைவருடி விட்டு ஆனந்தத்தையே தரும். இன்றையஅறிவியல் உலகில் மின்னணு சாதனங்களுக்காபஞ்சம். பிடித்த பாடல்களைச் சேகரித்துமுடிந்த நேரத்தில் கேட்க ஆரம்பியுங்கள். சிலநிமிடங்கள் இதில் செலவழிக்கப்பட்டால் அதுஉங்களை பல மணி நேரம் ‘மூட்’ மாறாமல்நல்ல மனநிலையை அமைப்பது உறுதி.
  2. திட்டமிடாத வாழ்க்கை பாழ்படும்வாழ்க்கை. எதிரதாக் காக்கும் அறிவினார்க்குஇல்லை அதிர வருவதோர் நோய்.(குறள்-429)திட்டமிட்டு வாழ்ந்தால் வாழ்க்கையில் ‘ஷாக்’இல்லை. சோகம் இல்லை. திட்டமிடும் போதுவெற்றியை எதிர்பார்க்கும் மன நிலையேஆனந்தத்தின் வாசல்; என்று உளவியல்ஆராய்ச்சிகள் அனைத்தும் குறிப்பிடுகின்றன.ஆகவே நல்ல திட்டங்களையும் அதற்கானவழிமுறைகளையும் வகுத்து நல்லவிளைவுகளுக்காக ஆவலுடன் காத்திருங்கள்.தொடர்ந்த இந்த முயற்சி சந்தோஷத்தைஅடைவதற்கான உறுதியான வழி!

       7 . நண்பர்களுடன் மனம் விட்டுஅளவளாவுவது எதிர்மறை உணர்வுகளைஉடனடியாக நீக்கி விடும். அவர்களை உடன்வைத்தே நல்ல திட்டங்களைத் தீட்டலாம். 80லட்சம் பேர்களை வைத்து நடந்த ஒரு சிறியஆராய்ச்சி பெரிய ஒரு உண்மையைவெளிப்படுத்தி உள்ளது. ஒருவர்இன்னொருவருடன்  டெலிபோனில் பேசும்போது அவருடன் மீண்டும் தொடர்பு கொண்டுபேசினால் அவர்களிடையே ஆழமான நட்புமலர்கிறது என்கிறது ஆய்வு முடிவு. நட்புக்குவிலை மதிப்பே இல்லை என்பதுஉண்மையானாலும் நட்பு மூலம் கிடைக்கும்இந்த மகிழ்ச்சியை பணம் மூலம்அடைவதெனில் நீங்கள் சுமார் 68 லட்சம்ரூபாய் ஆண்டு ஒன்றுக்கு செலவழிக்கவேண்டியிருக்கும் என்கிறது ஆய்வு.

  1. உங்களுக்கு நடந்த மூன்று நல்லவிஷயங்களைப் பட்டியலிடுங்கள்

இரவு படுக்கப்போகும் முன்னர், சிலநிமிடங்கள் அன்று நடந்த நிகழ்ச்சிகளைகோர்வையாக நினைத்துப் பாருங்கள். மிகபிரமாதமான நிகழ்வுகள் அன்றாடம் நிகழும்என்பதில்லை. ஆனால் நடந்தவற்றில் மூன்றேமூன்று நல்ல விஷயங்களை எண்ணிப் பார்த்துஅவற்றால் நீங்கள் ஏன் மகிழ்ச்சி அடைந்தீர்கள்என்பதையும் சற்று சிந்தியுங்கள். இப்படிப்பட்டநிகழ்வுகள் அதிகமாக வழி உண்டாஎன்பதையும் சற்று யோசியுங்கள். இந்தமுறையைப் பின்பற்றுமாறு சொல்லப்பட்ட ஒருஆய்வில், இதில் கலந்து கொண்ட அனைவரும்தங்கள் மகிழ்ச்சி ஆறே மாதங்கள் மிக அதிகஅளவில் பெருகியது என்று கூறினர். அத்தோடுமுன்பிருந்த மனச்சோர்வு, ஏமாற்றம் முதலியஎதிர்மறை உணர்வுகளும் அடியோடு நீங்கினஎன்றும் அவர்கள் தெரிவித்தனர். இதுவரைமேலே படித்தவற்றில் ஏதேனும் சிலவற்றைநீங்கள் ஏற்கனவே செய்திருந்தால் இப்போதேஉங்களுக்கு மூன்று நல்ல விஷயங்கள் உள்ளன!

  1. உங்களுக்கேஉரித்தான இயல்பான நல்லகுணங்களின் வலிமையை வளர்ப்பதால்உங்கள் மகிழ்ச்சி தானே பெருகும். எதில்நீங்கள் மிக நன்றாக இருக்கிறீர்கள்? எந்த ஒருவிஷயத்திலும் மேன்மை என்பதை நீங்கள்காட்டும்போது நீங்களும் மலர்ச்சிஅடைகிறீர்கள், மற்றவர்களும் உங்களைப்பாராட்டுகிறார்கள். எதையெல்லாம் நீங்கள்நன்றாகத் திறம்படச் செய்யமுடியும் எனஎண்ணிப் பாருங்கள். சிலருக்குமற்றவர்களுடன் பழகுவது சுலபமாக வரும்.பாடுவது, பேசுவது, விளையாட்டில் திறமை எனஇப்படி பல விஷயங்கள் உண்டு. நீங்கள் எதில்இயல்பாகவே திறமைசாலி? எதில் இயல்பாகவேமேன்மையுற்றவர். அதில் கவனக் குவிப்புசெய்து அதில் வலிமை பெறுங்கள் அந்ததிறமையை வளர்ப்பதற்கான பயிற்சியில் சற்றுநேரம் செலவழியுங்கள். அந்த பயிற்சிநேரங்களில் உங்கள் மகிழ்ச்சி பன்மடங்காகப்பெருக ஆரம்பிக்கும்.
  2.  நீங்கள்செயலூக்கம்குறைந்தவராக இருந்துஎப்போதுமே கனவு காணுவதில் இன்பம்கொள்பவராக இருந்தால் உங்களுக்கு ஒருசிறிய உதவிக் குறிப்பு இதோ! சந்தோஷமானபகல் கனவு ஒன்றைக் காணுங்கள் அன்றாடம்பகல் நேரத்தில் நம் மனது அங்கும் இங்கும்ஆயிரம் எண்ணங்களோடு அலை பாய்கிறது.அந்த அலைபாயும் மனதை உடன் மறைஎண்ணங்களில் அதாவது பாஸிடிவாக ஒரு முகப்படுத்துவது மிகுந்த ஆதாயத்தைத் தரும்!வாழ்க்கையை மகிழ்ச்சிகரமாக ஆக்க வல்லஉத்திகள் பற்றிய ஆய்வு ஒன்றுமேற்கொள்ளப்பட்டது. அதில் பாஸிடிவ்மனநிலை மிகுந்த திறன் வாய்ந்த ஒன்றாகஇருப்பது உறுதி செய்யப்பட்டது இதில் கலந்துகொண்டோர் தங்கள் வாழ்வில் நடந்தஇன்பமான நிகழ்வுகளையும் வெற்றிகரமானதருணங்களையும் உன்னதமான நட்பு,ஆழமான காதல் ஆகியவை பற்றியும் எண்ணிமகிழ்ந்தனராம். கடந்த கால குழப்பங்களையும்தோல்விகளையும் ஏமாற்றங்களையும்அலைபாயும் மனம் நினைத்தாலும் கூட நல்லபகல் கனவில் அது மகிழும் என்பது தான்உண்மை!

ஆக சந்தோஷமாக வாழ முடியவில்லையேஎன்று எண்ணி ஏங்கி எப்போதும் துக்ககரமாகஇருப்பதையே வாழ்க்கை முறையாகக்கொள்வோர் ஒரு சில நொடிகளில் அதிலிருந்துமீண்டு புதிய மகிழ்ச்சிகரமான வாழ்க்கையைநோக்கி அமைத்துக் கொள்ளலாம்.

Pic Source : http://allaboutkim.com/wp-content/uploads/2017/06/How-To-Be-Happy.jpg

****

உபநிடத சத்தியம் : மனமே பற! உயரப் பற!

                                              ச.நாகராஜன்

 1

மனமே, பற! உயரப் பற!!

பற, பற என்றால் எப்படிப் பறப்பதாம். முடியாது.முயன்று பார். அண்டார்டிகா போக முடியுமா?ஓ! அது முடியும். இதோ அண்டார்டிகா போய் விட்டேன். ஆஹா! க்ளேசியர் என்று சொல்கிறார்களே, பனிப்பாறைகள், ஓ, அற்புதம்!அட, அண்டார்டிகா சென்று அதன் வர்ணனை வேறா! திரும்பி வீட்டிற்கு வர முடியுமா?

வர முடியுமாவாவது. வந்தே விட்டேன். ஒரு நொடியில். பழைய டேபிள். அதே லாப் டாப்.! அதே அறை!!அட! இது போலப் பறக்க முடியாதா?ஓ! இது போலப் பறக்க முடியுமே. இதோ சந்திரன்! ஆர்ம்ஸ்ட்ராங்கின் கால்டித் தடங்களைப் பார்க்கிறேன். அட, அப்படியே செவ்வாய் கிரகம் செல்கிறேன். அங்கு தண்ணிரைப் பார்க்கிறேன்.

சபாஷ். என்ன சபாஷ், இதனால் எல்லாம் என்ன பிரயோஜனம். அலுப்புத் தான் மிஞ்சுகிறது. ஒரு பிரயோஜனமும் இல்லை.

வந்தாயா, வழிக்கு. அதனால் தான், மனமே பற, உயரப் பற என்றேன். பறப்பது என்றால் மேலே சும்மாவாவது பறப்பது என்று அர்த்தமில்லை. மனமே உயர்ந்த சிந்தனைகளைக் கொண்டு பற என்று சொன்னேன். அதனால் நீ மட்டுமல்ல; சமுதாயமே  மேலே எழும்பும்.

“அப்படி பறக்க எனக்குத் தெரியாது! உயரிய சிந்தனையோடு பற என்றால் என்ன அர்த்தம்?” அப்படிக் கேள், சொல்கிறேன். ஒரு வாஹனம் தருகிறேன். அதில் ஏறிப் பறந்தால் உயர்ந்த சிந்தனையோடு பறக்கலாம்.

அட, ஜோராக இருக்கிறதே. என்ன வாஹனம், எப்படிப் பறப்பது.உபநிடதம் என்னும் வாஹனம். அதில் ஏறினால் சிகரமான சிந்தனைகள் வரும். மனமே, உனக்கு மட்டுமல்ல,பிரயோஜனம், நீ அதைப் படித்தால் அனைவருக்குமே நல்லது நடக்கும் அளவிற்குச் சிந்தனை உயரும்.உபநிடதமா, பார்க்கலாமா?

உபநிடதங்கள் ஏராளம் உள்ளன. முக்கியமான 108 உபநிடதங்கள் இதோ உள்ளன. ஏதாவது ஒன்றை எடுத்துப் பாரேன்.சரி,கைக்கு வந்த இந்த் உபநிடதத்தைப் பார்க்கிறேன். இதன் பெயர் அம்ருத பிந்து உபநிடதம்.

“அழகான உபநிடதம்!”

அதில் முதல் வரிகளைப் பார், அதனால் உயரப் பறக்க முடியுமா என்று பார்!

ஓம். மனோ ஹி த்விதம் ப்ரோக்த்ம் சுத்தம் சாசுத்த மேவ ச I

அசுத்தம் காம ஸங்கல்பம் சுத்தம் காமவிவர்ஜிதம் II

 மன ஏவ மனுஷ்யாணாம் காரணம் பந்த மோக்ஷயோ:…I

“ஓ! அர்த்தம் என்ன?“மனது சுத்தம் என்றும் அசுத்தம் என்றும் இரு வகையாகக் கூறப்பட்டுள்ளது. ஆசையில் நாட்டமுடையது அசுத்தம். ஆசை இல்லாதது சுத்தம். மனதே மனிதர்களின் பந்தத்திற்கும் மோக்ஷத்திற்கும் காரணம்.” இது தான் அர்த்தம்.

மனமே!இதை மட்டும் சிந்தித்துப் பாரேன். உயரப் பறக்க முடிகிறதா!அட, மனமாகிய என்னைப் பற்றி அல்லவா இந்த உபநிடதம் கூறுகிறது. மன ஏவ மனுஷ்யாணாம். உண்மை தான். உண்மைகள் புரிய ஆரம்பிக்கின்றன!

2. மனதிற்கும் அதன் ரகசியம் உணர்ந்த ரிஷிக்கும் நடந்த (கற்பனை) சம்பாஷணையைத் தான் மேலே படித்தீர்கள்.மனதைப் பற்றிய ரகசியங்களை நன்கு விளக்கும் உபநிடதம் அமிருதபிந்து உபநிஷத். மனதை விஷயப்பற்றில்லாததாகச் செய்.

 உலகப் பொருள்களைப் போல் பரம்பொருள் சிந்தனைகுரியதன்று.ஆனால் சிந்திக்கத் தகாதது அன்று. சிந்தனைக்கெட்டாததாயினும் சிந்தித்தற்குரியது அது ஒன்றே. அப்படி காணும் போது பக்ஷபாதம் முற்றும் நீங்கிய பிரம்மம் அடையப்பட்டதாகிறது.

 3

மனதைப் பற்றிய இரகசியங்கள் அனைத்தையும் விளக்கும் அற்புத உபநிடதம் அமிருத பிந்து உபநிடதம்.22 ஸ்லோகங்கள் உள்ளன. 

ஸர்வபூதாதிவாஸஞ் ச யதுபூதேஷு வஸத்யதி I

ஸர்வானுக்ராஹகத்வேன ததஸ்ம்யஹம் வாஸுதேவ: II

ததஸ்ம்யஹம் வாஸுதேவ இதி II

 எல்லா உயிர்களும் எவனிடம் வாழ்கின்றனவோ, எவன் எல்லா உயிரிகளிடத்தும் அருள்புரிந்து கொண்டு வாழ்கின்றானோ அந்த வாஸுதேவன் நானாயிருக்கிறேன்.. அந்த வாஸுதேவன் நானாயிருக்கிறேன் என்றவாறு.

 என்று இப்படி முடிகிறது இந்த உபநிடதம். மூவுலகிலும் நிறைந்து வசிப்பதால் பகவானுக்கு வாஸுதேவன் என்ற பெயர் ஏற்பட்டது. 

அவனை மனதில் ஏற்றினால் மனம் பறக்கும்; உயரப் பறக்கும்.அதனால் நன்மை பறக்கும் மனதிற்கு மட்டுமல்ல; உலகிற்கே நன்மை!

 4

ராமகிருஷ்ண தீபம் என்னும் உரையுடன் ராமகிருஷ்ண மடம், மயிலாப்பூர் சென்னை-4,  108 உபநிடதங்களை உரையாசிரியர் அண்ணா அவர்களின் உரையுடன் வெளியிட்டிருக்கிறது. உபநிடதப் பொக்கிஷம் இது. தமிழில்  மட்டுமல்ல, உபநிடத விளக்கவுரைகள் ஆங்கிலத்திலும் கிடைக்கிறது.

பல ரகசியங்களை அறிந்து கொள்ளவும் நமது மனம் உயரப் பறக்கவும் ஒரே வழி -உபநிடதங்களைப் படிப்பது தான்!

Pic Source : https://i.ytimg.com/vi/1WFapJXkNZY/maxresdefault.jpg

வெற்றிக்கான கருத்துக்களை  உருவாக்குவது எப்படி? – 1               ச.நாகராஜன்

“சாரமாகச் சொல்லப் போனால், மனித சரித்திரமே கருத்துக்களின் வரலாறு தான்!        ஹெச்.ஜி.வெல்ஸ்

வாழ்க்கையில் வெற்றி பெறுவோரை நன்கு கவனித்துப் பார்த்தால் அவர்களின் வெற்றிக்கு அடிப்படையாக இலங்குவது அவர்களின் சில கருத்துக்களே என்பதை அறிந்து கொள்ளலாம். இப்படிப்பட்ட நல்லகருத்துக்களை எப்படிப் பெறுவது? அனைவராலும் பெற முடியுமா? முடியும் என்கிறது அறிவியல்.

லினஸ் பாலிங் (Linus Pauling –தோற்றம் 28-2-1901 மறைவு 19-8-1994) என்பவர் இரண்டு நோபல் பரிசுகளைப் பெற்ற பெரும் விஞ்ஞானி. இவருக்கு மூன்றாவது நோபல் பரிசும் கிடைக்க இருந்தது. நல்லகருத்துக்களைச் சொல்வதில் சிறந்த மேதை. உலக அமைதிக்காகப் பெரிதும் பாடுபட்டார். எப்படி இவருக்கு நல்ல அரிய கருத்துக்கள் உருவாகி வந்தன? அவரே இதைச் சுலபமாகச் சொல்லி விட்டார்.

“ஒரு நல்ல கருத்தை அடைவதற்கான சிறந்த வழி, ஏராளமானகருத்துக்களை உருவாக்கிக் கொள்வது தான்! பிறகு மோசமானவற்றைத் தூக்கி எறிந்து விட வேண்டும்”  – இது தான் அவரது எளிய வழி!

சுலபமான வழியாகத் தெரிந்த போதிலும் நிறைய கருத்துக்களை எப்படிஉருவாக்குவது என்ற கேள்வியும் கூடவே எழுகிறது.

விஞ்ஞானிகள் எப்படி கருத்துக்களை உருவாக்கிக் கொள்கிறார்கள் என்பதை ஜெர்மானிய விஞ்ஞானியான ஜூஸ்ட் ரீக் (Joost Reek) அழகாகச் சொல்கிறார். அவருக்கு இரண்டு ‘யங் கெமிஸ்ட் விருதுகள்’ கிடைத்த போது அவரைப் பேட்டி கண்ட ஒருவர் அவரது வெற்றிக்கானஇரகசியம் என்ன என்று கேட்டார்.

அதற்கு ரூஸ்ட்,” நான் ஒவ்வொரு நாளும் ஒரு கருத்தை எழுதி வைத்துக் கொள்வேன். ஒவ்வொரு முறை ஒரு புதிய ப்ராஜக்ட் அல்லது ஆய்வைத் தொடங்கும் முன்னர் என் முன்னே ஏராளமான கருத்துக்கள் இருக்கும். அதிலிருந்து ஒன்றை தேர்ந்தெடுத்துக் கொள்வது என்பது சுலபம். அவற்றிலிருந்து சிறந்த ஒன்றைத் தேர்ந்தெடுத்து அதில் ஆழ்ந்து ஈடுபடுவேன்” என்று பதில் கூறினார்.

இளம் வயதிலேயே பெரும் பேராசிரியராக ஆன அவர் தன் 42ஆம் வயதில் உலக விஞ்ஞானிகள் வரிசையில் ரசாயனத்தில் 643வது இடத்தில் இருந்தார். இதற்கான காரணம் ஒரு நாளைக்கு ஒரு புதிய கருத்து என்ற அவரது புதிய பாணி தான்!

இதை செயல்படுத்திப் பார்க்கலாம் என்று முனைந்த இளைஞர் ஒருவர் தன் ஆராய்ச்சியைத் தொடங்கினார். ஒரு நாளைக்கு ஒரு கருத்து என்று ஆரம்பித்தால் சில மாதங்களில் நிறைய கருத்துக்கள் சேரும். ஆனால் அவரோ தினசரி ஐந்து நிமிடங்கள் ஒரு இடத்தில் அமர்ந்து தனக்குத் தோன்றிய கருத்துக்களை எல்லாம் ஒரு நோட்புக்கில் குறித்து வரலானார், அத்தோடு அவ்வப்பொழுது தனக்குத் தோன்றும் கருத்துக்களையும் குறித்துக் கொண்டார். நிறைய கருத்துக்கள் தோன்ற வேண்டுமெனில் தனக்குப் பிடித்த விஷயம் சம்பந்தமாக பிரபல விஞ்ஞானிகள் ஐன்ஸ்டீன், பெர்மி ஆகியோர் படித்ததைப் போல தனக்கே உரித்தான பொருள் பற்றிப் பல புத்தகங்களையும் படிக்க ஆரம்பித்தார். ஆகவே புதிய கருத்துக்கள் உதயமாக ஆரம்பித்தன. இவற்றை 30 நாட்கள் கழித்து ஆராய்ந்து பார்த்ததில் அன்றாடம் ஐந்து நிமிடத்தில் உதயமான கருத்துக்கள் மொத்தம் 208. அவ்வப்பொழுது குறித்து வைத்த கருத்துக்கள் மொத்தம் 35. ஆக தினமும் ஐந்து நிமிடம் ஊன்றி யோசித்தால் புதிய கருத்துக்கள் அவ்வப்பொழுது தோன்றுவதை விட ஐந்து மடங்கு அதிகமாகத் தோன்றுகிறது. சரி, அவற்றின் தரம் எப்படி? இதற்கு விடை காண அவரே ஒன்று முதல் 10 வரை மதிப்பெண் கொடுத்தார். ஒன்று என்றால் உருப்படாத ஐடியா இரண்டு என்றால் நடைமுறைக்கு ஒவ்வாதது இப்படியே 10 என்றால் அற்புதம், அருமை என்ற படி மதிப்பெண் கொடுத்து ஒவ்வொரு கருத்தும் இந்த மதிப்பெண் வரிசையில் எந்த இடத்தில் வருகிறது என்று பார்த்தார். முதலிடம் பெறும் கருத்துக்களின் அடிப்படையில் திட்டங்களை வகுத்தார். இந்த ஆய்வு உணர்த்திய முக்கிய உண்மை ஐந்து நிமிடம் யோசிக்கும் போது உருவாகும் கருத்துக்களும் அவ்வப்பொழுது தோன்றும் கருத்துக்களும் தரத்தின் அடிப்படையில் ஒன்று தான். ஆனால் உட்கார்ந்து ஒரு இடத்தில் சிந்திக்கும் போது கருத்துக்களோடு அவற்றைச் செயல்படுத்தும் வழி முறைகளும் பிறக்கின்றன என்பதை அவர் கண்டறிந்தார். அவரது அனுபவம் மூன்று உண்மைகளைச் சுட்டிக் காட்டின:-

1)    உங்களுக்கு விருப்பமான ஒன்றில் தினசரி ஐந்து நிமிடம் ஆழ்ந்து யோசித்து கருத்துக்களை உருவாக்குங்கள்.

2)    ஒரு விஞ்ஞானியின் ஆய்வின் தரமானது அவன் கொண்டுள்ள கருத்துக்களின் எண்ணிக்கைக்கு இணங்கவே இருக்கிறது என்று டீன் கெய்த் சிமொண்டான் தனது ‘ஆரிஜின்ஸ் ஆஃப் ஜீனியஸ்’ நூலில் சொல்வதை மனதில் கொள்ளுங்கள்.

3)    அவ்வப்பொழுது உருவாகும் கருத்துக்களை விட தினமும் குறிப்பிட்ட நேரம் ஒதுக்கும் போது உருவாகும் கருத்துக்கள் சிறப்பாக உருவாவதற்கான காரணம் கவனக் குவிப்பினால் தான். வழிமுறைகளும் அந்த கருத்துக்களுடன் தோன்றும்

இந்த புதிய வழியில் அன்றாடம்  கருத்துக்களை  உருவாக்கி அவற்றை அலசி ஆராய்ந்து குப்பை போன்றவற்றை ஒதுக்கி விட்டு நல்லனவற்றில் ஆழ்ந்து ஈடுபட்டு அவற்றை நடைமுறைப் படுத்தினால் வெற்றி நிச்சயமே!

புதிய கருத்துக்களை உருவாக்க உள்ள சில வழிகளை மேலும் பார்ப்போம்.

Pic Source :  http://i.telegraph.co.uk/multimedia/archive/01699/linus-pauling_1699054c.jpg

******************

எழுத ஆசையா? இதோ டிப்ஸ்! ச.நாகராஜன்

2103ஆம் ஆண்டு இலக்கியத்தில் நோபல் பரிசு பெற்ற ஆலிஸ் மன்ரோ ஒரு கதை எப்படி இருக்க வேண்டும் என்பதைப் பற்றி விவரிக்கையில்,” ஒரு கதையானது சுலபமாகப் பயணம் செய்ய லாயக்கான நெடுஞ்சாலை போல இருக்க வேண்டும்….. அது ஒரு வீடு போல அமைய வேண்டும். அதற்குள் சென்று அங்கும் இங்கும் சற்று அலைந்து நமக்குப் பிடிக்கும் ஒரு இடத்தில் இளைப்பாற அமர்ந்து எப்படி முற்றமும் வீட்டின் அறைகளும் ஒன்றுக்கொன்று தொடர்புடையதாக இருக்கிறது என்பதை அறிவது போலவும் வீட்டின் ஜன்னலிலிருந்து வெளியுலகைப் பார்க்கும் போது அது எப்படி மாறுபட்டிருக்கிறது என்பதைக் கண்டுபிடிப்பது போலவும் ஒரு கதை அமைய வேண்டும்..அந்த வீட்டில் அடுத்த முறை போகும் போது அதில் போன முறை பார்க்காத இன்னும் புதுமையானவற்றைப் பார்ப்பது போலவும் ஒரு கதை இருக்க வேண்டும்” என்றார். இதையே வள்ளுவர் நவில்தொறும் நூல் நயம் என்று சுருக்கமாக அழகாகக் குறிப்பிட்டு விட்டார்.

எழுதுவதற்கு ஆசை தான், ஆனால் எப்படி எழுதுவது என்று தான் தெரியவில்லை என்று சொல்பவர்கள் ஏராளம். அவர்களுக்கு டிப்ஸ் தர பல எழுத்தாளர்கள் தயார். ஆனால் குறிப்பிடத் தகுந்த குறிப்புகளைத் தருகிறார் பிரபல அமெரிக்க எழுத்தாளரான கர்ட் வானகட். ‘எப்படி எழுத வேண்டும்’ என்பதற்கான அவரது உபயோகரமான எட்டு உதவிக் குறிப்புகளைக் கீழே பார்ப்போம் :.

1) உங்களுக்குப் பிடித்தமான ஒரு சப்ஜெக்டை எடுத்துக் கொள்ளுங்கள். அது உங்கள் இதயத்தில் பதிந்து மற்றவர்களும் உணர்ந்து அனுபவிக்கவேண்டுவதாய் இருப்பது அவசியம். வார்த்தை விளையாட்டுகள் தேவை இல்லை. ஆனால் உணர்வுகளை அழுத்தமாகப் பதிய வைப்பதாய் இருக்க வேண்டும்.

2) வளவளவென்று நீட்டிக் கொண்டே போகக் கூடாது. சொல்ல வந்ததைச் சொல்லியாகி விட்டதா! உடனே முடித்து விடுங்கள்.

3) உங்கள் நடை எளிமையாக இருக்க வேண்டும். உலகில் கதை சொல்லுவதில் வல்ல மிகப் பெரிய இரண்டு பேரை உதாரணமாக எடுத்துக் கொள்ளுங்கள். ஷேக்ஸ்பியரும் ஜேம்ஸ் ஜாய்ஸும் எப்படி மிக எளிமையாக எழுதினார்கள், தெரியுமா? அவர்களின் எழுத்து குழந்தைகளின் நடை போல இருந்தது. ஆனால் கதாபாத்திரங்களோ ஆழமான கதாபாத்திரங்கள். ஷேக்ஸ்பியரின் ஹாம்லெட், “டு பீ ஆர் நாட் டு பீ” (To be or not to be) என்று கேட்பது போல ஆழமான அர்த்தத்தை உருவாக்கும் வார்த்தைகள் இருந்தால் தான் சிறப்பு. இதில் உள்ள வார்த்தைகளில் மிக அதிகமான எழுத்துக்கள் மூன்றே மூன்று தான் என்பதை நோக்கினால் ஆச்சரியமாக இல்லை? இதே போல ஜேம்ஸ் ஜாய்ஸின் புகழ் பெற்ற கதாபாத்திரமான ஈவிலினைப் பற்றி அவர் சித்தரிக்கும் ஒரு வரியும் மூன்றே மூன்று வார்த்தைகளைத் தான் கொண்டிருக்கும். “அவள் களைத்து இருந்தாள்” (She was tired) – கதை ஓட்டத்தில் இந்த வார்த்தைகள் வரும் இடத்தில் இதைப் போல படிப்பவர்களின் இதயத்தை வேறு எந்த வார்த்தைகளாலும் உருக வைக்க முடியாது! எளிமையாக எழுதுவது என்பது லேசான விஷயம் அல்ல. அது மிகவும் கடினம் என்பதோடு புனிதமானதும் கூட. பைபிளின் முதல் வாக்கியம் கூட பதிநான்கே வயதான ஒரு சிறுவன் எழுதி விடக்கூடியதாகத் தான் இருக்கிறது! (In the beginning God created the heaven and earth.)
ஆனால் அதன் கருத்தாழம் தான் எப்படி இருக்கிறது, பாருங்கள்!
4. க்ளியோபாட்ராவுக்கு பல நெக்லெஸ்கள் அமைத்துச் சூட வைக்கும் வல்லமை உங்களிடம் இருக்கலாம். ஆனால் உங்கள் வார்த்தை வல்லமை நீங்கள் சொல்ல விரும்பும் கருத்தை அழகிய விதத்தில் சொல்ல வல்லதாய் அமைந்தால் போதும்!. எவ்வளவு பிரமாதமாக ஒரு வாக்கியம் நெக்லெஸ் போல ஜொலித்தாலும் சரி, அது நீங்கள் எடுத்துக் கொண்ட பொருளை ஜொலிக்க வைக்கவில்லை என்றால் தயவு தாட்சண்யம் பார்க்காமல் அதை வெட்டித் தூக்கி எறிந்து விடுங்கள்.
5. நீங்கள் எழுதும் நடையில் வரும் பேச்சுக்கள் நீங்கள் குழந்தையாக இருந்த போது கேட்டதை எதிரொலிக்க வேண்டும். அது ஒரு தகர டின்னை ஹாக்ஸா வைத்து அறுக்கும் போது எழும் கடூரமான ஒலியைக் கொண்டிருக்கக் கூடாது!
6. நீங்கள் சொல்ல நினைத்ததை மட்டும் சொல்லுங்கள். படிப்பவர்கள் அதைப் புரிந்து கொள்ள வேண்டும், அவ்வளவு தான்!
7. படிப்பவர்கள் மீது கொஞ்சம் கருணை காட்டுங்கள். அவர்கள் தினமும் ஆயிரக்கணக்கான எழுத்துக்களைப் பார்க்க வேண்டியதாயிருக்கிறது. ஆகவே அதிகமாகவும் எழுத வேண்டாம், கவர்ச்சியாகவும் எழுத வேண்டாம். படிப்பவர்கள், பாவம், பெரும் கலைஞர்கள் அல்ல.நீங்கள் உயரப் பறக்கும் பறவையாக இருந்து கூவ நினைக்கையில் அவர்கள் தரையில் கானத்தின் விளக்கம் தர விரும்பும் ஆசிரியர்களையே எதிர்பார்க்கிறார்கள்!
8.எழுத்து நடை பற்றி புகழ்பெற்றவர்கள் எழுதிய நூல்களைப் படியுங்கள் (உதாரணமாக தி எலிமெண்ட்ஸ் ஆஃப் ஸ்டைல் – ஈ.பி. ஒய்ட் எழுதிய நூலைக் குறிப்பிடலாம்.)
கர்ட் வானகட்டின் குறிப்புகளைப் படித்தாகி விட்டதல்லவா! இனி இதயத்தில் பதிந்திருக்கும் ஒரு பொருளை அடுத்தவரும் அறிந்து அனுபவிக்க வேண்டும் என்று தோன்றினால் எடுங்கள் பேனாவையும், பேப்பரையும்! சித்திரமும் கைப்பழக்கம்; செந்தமிழும் நாப்பழக்கம்; எழுதுவதும் தினப்பழக்கம்!

சின்ன உண்மை!
பிரபல எழுத்தாளரான ஜேம்ஸ் ஜாய்ஸ் (1882-1941) பல ஆண்டுகள் இரவில் படுக்கையில் படுத்துத் தான் எழுதினார். ஒரு வெள்ளை கோட்டைப் போட்டுக் கொண்டு நீல பென்சில் ஒன்றினால் அவர் எழுதுவது வழக்கம். அவரது சகோதரி, “ அந்த கோட் கொஞ்சம் வெண்மையான ஒளியை அவருக்குத் தந்தது என்கிறார். ‘ஜாய்ஸுக்குச் சற்று மங்கலான கண் பார்வை என்பதால் இந்த ஒளி அவர் பேப்பரில் என்ன எழுதி இருக்கிறார் என்பதைப் பார்க்க உதவியது.

Pic Source : http://images.huffingtonpost.com/2015-05-04-1430760765-4114796-womanwriting.jpg

க்ரிட் டெஸ்ட்!      ச.நாகராஜன்

ஹௌ இன்டெலிஜெண்ட் ஆர் யூ (How intelligent are you?) என்ற கேள்வி போய் ஹௌ க்ரிட்டி ஆர் யூ (How gritty are you?) என்ற கேள்வியே இன்று உலகில் முதலில் கேட்கப்படும் கேள்வியாக ஆகிக் கொண்டிருக்கிறது. (grit என்ற ஆங்கில வார்த்தைக்கு ஆக்ஸ்போர்ட் அகராதி courage மற்றும் resolve (தைரியம் மற்றும் மன உறுதி) என்று அர்த்தம் தருகிறது)
ஆயிரத்தி தொள்ளாயிரத்து அறுபதுகளில் ஸ்டான்போர்டைச் சேர்ந்த உளவியலாளர் வால்டர் மிச்செல் என்பவர் ‘மார்ஷ்மல்லோ சோதனை’ என்ற ஒரு சோதனையை நடத்தினார். நான்கு வயதுள்ள குழந்தைகள் மட்டும் சோதனைக்காக தேர்ந்தெடுக்கப்பட்டனர். அவர்களின் மேஜைகளில் இனிப்புப் பண்டம் அழகாக வைக்கப்பட்டிருந்தது. விஞ்ஞானிகள் குழந்தைகளை நோக்கி உடனே வேண்டுமென்றால் ஒரு இனிப்புப் பண்டம் தான் எடுத்துக் கொள்ளலாம் என்றும் 15 நிமிடங்கள் கழித்து என்றால் இரு இனிப்புப் பண்டங்களை எடுத்துக் கொள்ளலாம் என்று கூறினர். எல்லா குழந்தைகளுமே (இரண்டிற்கு ஆசைப்பட்டு) காத்திருப்பதாகச் சொன்னார்கள். ஆனால் எல்லோராலும் அப்படிக் காத்திருக்க முடியவில்லை சிலர் மட்டுமே பதினைந்து நிமிடம் காத்திருந்து இரண்டைப் பெற்றுக் கொண்டனர்.
இதே குழந்தைகளை விஞ்ஞானிகள் உயர்நிலைப் பள்ளியில் தொடர்ந்து கண்காணித்தனர். யாரெல்லாம் மன உறுதியுடன் 15 நிமிடம் காத்திருந்தனரோ அவர்கள் அனைவரும் உயர்நிலைப் பள்ளியிலும் சிறந்து விளங்கினர்.அதிக மார்க்குகளைப் பெற்றனர். மிச்செல், “அவர்கள் தங்களது கவனத்தை சிறப்பான உத்தி மூலம் பங்கீடு செய்தனர் இனிப்புப் பண்டத்தை உற்றுப் பார்க்காமல் மேஜைக்கு அடியில் பார்வையைச் செலுத்தி அவர்கள் தங்களது கவனத்தைத் திசை திருப்பினர். அவர்களது மன உறுதியே இதற்குக் காரணம்” என்றார்.
இந்த அடிப்படையில் இப்போது க்ரிட் டெஸ்ட் மிக முக்கியத்துவம் வாய்ந்ததாக ஆகி விட்டது.
இப்போது அனைவருக்குமான க்ரிட் டெஸ்ட் கீழே தரப்படுகிறது.
க்ரிட் டெஸ்ட்
கீழே 12 கேள்விகள் உள்ளன. ஒவ்வொரு கேள்விக்கும் பின்னால் கீழே தரப்படும் ஐந்து சாய்ஸ்களில் – விருப்பத் தேர்வுகளில்- உங்களுக்குப் பொருத்தமானதாக நீங்கள் கருதுவதை டிக் செய்து கொள்ளுங்கள்
நிச்சயம் நான் தான் இது
என்னைப் போலவே அசலாக இருக்கிறது இது
சிறிது என்னை ஒத்திருக்கிறது இது
என்னைப் போல இல்லை.
நிச்சயமாக நான் இல்லை இது

1.ஒரு முக்கியமான சவாலை எதிர்கொண்டு வெற்றி பெறுவதற்காக அதில் இருந்த பின்னடைவுகளைத் தகர்த்து வெற்றி கொண்டேன்.
2. புதிய கருத்துக்களும் திட்டங்களும் சில சமயங்களில் என்னை முந்தைய திட்டாங்களிலிருந்து திசை திருப்புகிறது.
3, எனது விருப்பங்கள் வருடத்திற்கு வருடம் மாறுகிறது.
4.பின்னடைவுகள் என்னைத் தளரச் செய்யாது.
5. ஒரு கருத்தில் அல்லது திட்டத்தில் மிகவும் வெறியாக சில காலம் இருந்து விட்டுப் பின்னர் அதில் ஆர்வமே எனக்குப் போய் விடுகிறது.
6.நான் ஒரு கடின உழைப்பாளி.
7. நான் முதலில் ஒரு லட்சியத்தை மேற்கொள்வேன். பின்னர் வேறொன்றைப் பின்பற்ற ஆரம்பிப்பேன்.
8. முடிப்பதற்குச் சில மாதங்கள் ஆகும் திட்டங்களின் மீது என் கவனத்தைக் குவிப்பதில் எனக்கு மிகவும் சிரமமாக இருக்கிறது.
9.ஆரம்பித்த எதையும் முடித்து விடுவேன்.
10. பல வருட வேலையைக் கொண்ட ஒரு லட்சியத்தில் நான் வெற்றி பெற்றேன்.
11. புதிய விஷயங்களில் ஒவ்வொரு சில மாதங்களிலும் எனக்கு ஆர்வம் வருகிறது.
12. நான் தளராதவன்
இப்போது தேர்வை முடித்த நிலையில் எவ்வளவு மார்க்குகளை நீங்கள் பெறுகிறீர்கள் என்பது முக்கியம்.
1,4,6,9.10,12 ஆகிய கேள்விகளுக்கு கீழே உள்ளபடி மார்க்குகளைப் போட்டுக் கொள்ளுங்கள்
5 மார்க் – நிச்சயம் நான் தான் இது
4 மார்க் – என்னைப் போலவே அசலாக இருக்கிறது இது
3 மார்க் – சிறிது என்னை ஒத்திருக்கிறது இது
2 மார்க் – என்னைப் போல இல்லை.
1 மார்க் – நிச்சயமாக நான் இல்லை இது
2,3,5,7,8,11 ஆகிய கேள்விகளுக்கு கீழே உள்ளபடி மார்க்குகளைப் போட்டுக் கொள்ளுங்கள்
1 மார்க் – நிச்சயம் நான் தான் இது
2 மார்க் – என்னைப் போலவே அசலாக இருக்கிறது இது
3 மார்க் – சிறிது என்னை ஒத்திருக்கிறது இது
4 மார்க் என்னைப் போல இல்லை.
5 மார்க் – நிச்சயமாக நான் இல்லை இது
12 கேள்விகளுக்கும் மேலே கண்டபடி மார்க்குகளை போட்டுக் கொண்ட பின் மொத்தத்தைக் கூட்டுங்கள். கூடுதல் தொகையை 12ஆல் வகுங்கள். 5 என்பது அதிக மன உறுதியைக் காட்டும். 1 என்பது குறைந்த மன உறுதியைக் காட்டும். உங்கள் மார்க்குக்கு ஏற்ப மன உறுதியை அதிகப் படுத்தும் வழிகளை மேற்கொள்ளுங்கள்.வெற்றி நிச்சயம்.
சின்ன உண்மை!
க்ரிட் டெஸ்டில் குறைந்த மார்க்குகளே கிடைத்துள்ளது என்று யாரும் வருத்தப்பட வேண்டாம். க்ரிட் என்பதையும் புத்திகூர்மையை வளர்த்துக் கொள்வது போல வளர்த்துக் கொள்ளலாம் என்கிறார் ஆஞ்சலா டக்வொர்த்.

Pic Source : https://www.authentichappiness.sas.upenn.edu/sites/default/files/styles/slider/public/banner/Grit%20slider.png?itok=IXgKcPij

வள்ளுவர் அறிவுறுத்தும் விரைந்து செய்ய வேண்டிய மூன்று செயல்கள்!
ச.நாகராஜன்
மூன்றை விரைந்து செய்!
முடிந்த போதெல்லாம் விரைந்து செய்ய வேண்டிய செயல்கள் மூன்று என்கிறார் வள்ளுவர்.
இதற்கு அவர் பயன்படுத்தும் சொல் – ‘ஒல்லும்’

ஒல்லும் வகையான் அறவினை ஓவாதே செல்லும் வாயெல்லாஞ் செயல் (குறள் 33)

தர்மத்தை இடைவிடாமல் செய்ய வேண்டும். தன்னால் இயன்ற அளவு செய்ய வேண்டும். செய்யக் கூடிய வழியில் எல்லாம் மனம், மொழி, மெய் ஆகியவற்றால் செய்ய வேண்டும்.

ஒல்லும் வாயெல்லாம் வினை நன்றே ஒல்லாக்கால் செல்லும் வாய் நோக்கிச் செயல் (குறள் 673)

செய்து முடிக்கக் கூடிய இடத்தில் எல்லாம் ஒரு காரியத்தை உடனே செய்து முடிப்பது நல்லது. அப்படிச் செய்ய ஒரு வேளை முடியவில்லை என்றால் செல்லும் வாய் நோக்கி – ஏற்ற இடம் நோக்கிச் செய்து விடு.

நட்பிற்கு வீற்றிருக்கை யாதெனில் கொட்பின்றி ஒல்லும் வாய் ஊன்றும் நிலை (குறள் 789)

நட்பிற்குச் சிறந்த நிலை யாது? எனில், மாறுபாடு இல்லாமல் முடிந்த இடமெல்லாம் உதவி செய்து தாங்குகின்ற நிலையாகும்.
தர்மத்தைத் தள்ளிப் போடாதே! உடல் அழியும் காலத்தில் அழியாமல் உடன் வந்து காக்கும் துணை அறம் ஒன்றே. பொன்றுங்கால் பொன்றாத் துணை அறம். ஆகவே மெல்லச் செய்து கொள்ளலாம் (அன்றறிவாம் என்னாது) என்றில்லாமல் உடனே செய்!

எந்த ஒரு காரியத்தையும் தள்ளிப் போடாதே!
நட்புக்காக முடிந்த போதெல்லாம் உதவி செய்!
இடைவிடாது செய்ய வேண்டியவை அறவினை புரிதல், வினை முடித்தல், நட்பைத் தாங்குதல்.
ஒன்றால் இம்மைக்கும் மறுமைக்கும் வழியைக் காட்டினார். அடுத்ததால் இவ்வுலக வாழ்க்கையின் வெற்றிக்கு வழியைக் காட்டினார். மூன்றாவதன் மூலம் நமக்கு என்றும் இருக்கும் துணையை உறுதி செய்து பலன் பன் மடங்கு வரும் என்பதை தெரிவிக்கிறார். ஏனெனில் பயன் தெரிவார் தினைத் துணை உதவியையும் பனைத் துணையாக் கொள்வார் அல்லவா!
வள்ளுவரின் சொற்களின் ஆழம் லேசுப்பட்டதா, என்ன? தோண்டத் தோண்ட மணற் கேணி போல அர்த்தம் ஊறிக் கொண்டே இருக்கும்!
************
வள்ளுவராலும் பதில் சொல்ல முடியாத கேள்வி!
ச.நாகராஜன்
மன்றம் கூடியது
சில நிமிடங்களில் ஊர் மன்றம் கூடி விட்டது! ஏன்?
வள்ளுவர் வந்திருக்கிறாராம்!
வள்ளுவர் வந்திருக்கிறாராம்!
செய்தி அதிக வேகத்தில் பரவவே, பறக்கவே அனைவரும் ஊர் மன்றமான ஆலமரத்தடியில் கூடி விட்டனர். ஆலமரத்தைச் சுற்றியுள்ள மேடையில் அமர்ந்திருப்பவர் நிஜமாகவே வள்ளுவர் தான்!
அவரை வணங்கினர்; தொழுதனர்; கை கட்டி, வாய் மூடி உற்றுப் பார்த்து தங்களின் தரிசன பாக்கியத்தை நினைத்து மகிழ்ந்தனர்.
இன்று முழித்த வேளை நல்ல வேளை!
மெதுவாக ஊர்ப் பெரியவர் ஒருவர் எழுந்தார். ‘பெரிசு’ ஏதாவது பொருள் பொதிந்த ஒன்றைத் தான் கேட்கும்! அனைவரும் ‘பெரிசையும்’ அதற்கு வள்ளுவர் என்ன சொல்லப் போகிறார் என்பதையும் ஆவலுடன் எதிர் நோக்கினர்.
அப்போது கூட்டமாகக் கூடி இருக்கும் கூட்டத்தைப் பார்த்து பிச்சை எடுக்கும் வறியவன் ஒருவனும் ஓரமாக வந்து நின்றான்.
பத்துக் கேள்விகள்
பெரியவர் கேட்டார்: “வள்ளுவரே! வணக்கம். உங்கள் அருளை நாடி நிற்கிறோம். அருள் அல்லாதது யாது?
வள்ளுவர் அவரைக் கனிவுடன் நோக்கினார். பின்னர் கூறினார்:-
“அருள் அல்லது யாதெனின் கொல்லாமை கோறல் பொருள் அல்லது அவ்வூன் தினல் (குறள் 254)
ஒரு கேள்வி; அதற்கு அற்புதமாக இரண்டு விஷயங்களைப் பதிலாகப் பெற முடிந்தது. ஒரு உயிரையும் கொல்லாமல் இருப்பதே அருள்; அந்த மாமிசத்தை வாங்கித் தின்னுவதே பொருள் அற்றது.
ஊர் மக்கள் சைவ உணவை மட்டும் உண்ணத் தீர்மானித்து விட்டனர்.
ஒரு கேள்வி கேட்டு பதிலும் வந்ததால் அடுத்தவர் மெல்ல எழுந்தார்.
“வாய்மை எனப்படுவது யாது?”
“வாய்மை எனப்பதுவது யாதெனின் ..
யாதெனின்?!
“யாதொன்றும் தீமை இலாத சொலல்” (குறள் 291)
ஆஹா! எளிமையான சுருக்கமான சூத்திரமாக இருக்கிறதே! பிற உயிருக்குத் தீமை பயக்காத சொற்களைச் சொல்லுவதே வாய்மை!
மூன்றாமவர் எழுந்தார்:-“ அறவினை யாது?”
“அறவினை யாதெனின் கொல்லாமை கோறல் பிறவினை எல்லாம் தரும்” (குறள் 321)
தான் முதலில் சொன்னதை மீண்டும் வலியுறுத்தி வள்ளுவர் கூறியதை அனைவரும் பக்தியுடன் மனதில் குறித்துக் கொண்டனர். பிற உயிரைக் கொல்லாமல் இருப்பதே அறவினை. அப்படிக் கொல்வோருக்கு அறமற்ற பிற தீவினைகள் சேரும்.
கூட்டத்தில் அஹிம்சையைப் பின்பற்றுபவருக்கு ஒரே சந்தோஷம். மனதிற்குள் உருகினார்.
இன்னொருவர் கேட்டார்:- “நல் ஆறு யாது?”
நல்ல வழி எது என்றா கேட்கிறீர்கள்?
வள்ளுவர் கூறினார்:-“நல் ஆறு எனப்படுவது யாதெனின் யாதொன்றும் கொல்லாமை சூழும் நெறி” (குறள் 324)
அட, அதே கருத்து! திருப்பித் திருப்பி வலியுறுத்துகிறாரே! சொல் சிக்கனம் உடைய வள்ளுவர் ஆழ்ந்த கருத்தை வலியுறுத்தி, எந்த உயிரையும் கொல்லாமல் இருப்பதே நல் ஆறு என்கிறாரே!
கையிலுள்ள பணம் சுருங்கக் கூடாது; குறையக் கூடாது என்ற கவலையில் இருந்தவர் கேட்டார்:- : செல்வத்திற்கு அஃகாமை யாது?
வள்ளுவர் சிரித்தார்:- “

அஃகாமை செல்வத்திற்கு யாதெனின் வெஃகாமை வேண்டும் பிறன் கைப் பொருள்” (குறள் 178)

பிறர் கைப்பொருளைக் கவரக் கூடாது என்று இருத்தலே தன் கைப்பொருள் சுருங்காமல் இருக்கும் வழி!
மோசமான அரசியல்வாதிகள் எல்லாம் அங்கு தலையைக் குனிந்து கொண்டனர்.
நண்பர்கள் இருவர் எழுந்தனர்: ஒருவர் கேட்டார்:-“நட்பிற்குச் சிறந்த நிலை யாது?”
பதில் உடனே வந்தது:

“நட்பிற்கு வீற்றிருக்கை யாதெனின் கொட்பின்றி ஒல்லும் வாய் ஊன்றும் நிலை” (குற:ள் 789)
நட்பிற்கு வீற்றிருக்கை – சிறந்த நிலை – மாறுபாடின்றி முடிந்த போதெல்லாம் உதவி செய்து தாங்கிக் கொண்டிருப்பதே ஆகும்.
அடுத்த நண்பர் பளிச்சென்று உடனே கேட்டார்:-“பழைமை எனப்படுவது யாது?”

“பழைமை எனப்படுவது யாதெனின் யாதும் கிழமையைக் கீழ்ந்திடா நட்பு” (குறள் 801)

பழகிய நட்பு, அதாவது பழைமை எனப்படுவது யாதெனில் பழகிய நண்பர் உரிமையாய் செய்யும் எந்தச் செயலையும் அவமதிக்காது ஏற்றுக் கொள்வதேயாகும்.
நண்பர்கள் இருவரும் மகிழ்ந்தனர்.
அடுத்தவர் எழுந்தார்: “பேதைமை என்பது யாது?”
“பேதைமை அதாவது அறியாமை யாது என்று தானே கேட்கிறீர்கள்?

பேதைமை என்பதொன்று யாதெனின் ஏதங்கொண்டு ஊதியம் போக விடல் (குறள் 831)

அறியாமை என்று சொல்லப்படுவது யாதென்றால், தனக்குக் கேடு விளைவிப்பனவற்றைக் கைக்கொண்டு நன்மை தருபனவற்றைக் கை நழுவி விடச் செய்வதாகும்!
இன்னொருவர் எழுந்தார்:-“ வெண்மை எனப்படுவது யாது?”

“வெண்மை எனப்படுவது யாதெனின் ஒண்மை உடையம் யாம் என்னும் செருக்கு” (குறள் 844)

வெண்மை அதாவது புல்லறிவு – கீழான அறிவு எதுவெனில் யாம் நிறைந்த அறிவு உடையோம் என்று தம்மைத் தாமே மதித்துக் கொண்டிருக்கும் செருக்கு- அகம்பாவம் – தான்!
கூட்டத்தினர் அகம் மிக மகிழ்ந்தனர். எத்தனை ‘யாதெனின்?’ கேள்விகள். அத்தனைக்கும் உடனுக்குடன் பதில்!
வள்ளுவர் எட்டிப் பார்த்தார். ஓரத்தில் இருந்த பிச்சைக்காரன் முண்டியடித்துக் கொண்டு முன்னே வந்தான்.
வள்ளுவர் அவனுக்கு வழி விடுமாறு சைகை காட்டவே அனைவரும் ஒதுங்கினர்.
அவன் முன்னே வந்தான். “ஐயா! வணக்கம். இன்மையின் இன்னாதது யாது?”
தான் எடுக்கும் இந்த பிச்சையை விடக் கொடியது ஏதாவது இருக்கிறதா?
மனம் கலங்கி இருக்கும் அவனைப் பார்த்த வள்ளுவர் எழுந்தார். அனைவரும் எழுந்தனர்.
இன்மையின் இன்னாதது யாதெனின்..
அனைவரும் வள்ளுவரையே கவனித்தனர். இன்மையின் இன்னாதது யாதெனின்..
யாதெனின்..
வள்ளுவராலும் பதில் சொல்ல முடியாத கேள்வி என்று கூட ஒன்று உண்டா, என்ன?

யாதெனின்;;
என்ன, வள்ளுவர் தடுமாறுகிறார். உடனுக்குடன் பதில் அளித்த வள்ளுவரா, யோசிக்கிறார், தடுமாறுகிறார், பதிலுக்காகத் தவிக்கிறார்.
கூட்டம் வியந்தது; பிரமித்தது.
தன் நிலையை அடைந்த வள்ளுவர் கூறினார்:-

“இன்மையின் இன்னாதது யாதெனின் இன்மையின் இன்மையே இன்னா தது” (குறள் 1041)

வறுமையை விடக் கொடியது என்னவென்றால்,.. என்னவென்றால் .. வறுமையைப் போலக் கொடியது வறுமையே தான்!
வள்ளுவரும் கலங்கி நின்றதைப் பார்த்த மன்றமே கலங்கியது.
பிச்சைக்காரன் கண்ணைத் துடைத்துக் கொண்டான்.
வள்ளுவரின் சாபம்
வள்ளுவர் சற்று உரத்த குரலில் கூறினார்:-

“இரந்தும் உயிர் வாழ்தல் வேண்டின் பரந்து கெடுக உலகியற்றியான்” (குறள் 1062)

பிச்சை எடுத்தும் உயிர் வாழுமாறு சிலரைப் படைத்திருந்தால் அந்த உலகை இயற்றியவன் அதே போல பிச்சை எடுத்து அலைந்து திரியட்டும்!
பிச்சைக்காரனின் தோள் மீது கையைப் போட்டுக் கொண்டார் வள்ளுவர். அனைவரும் அவர் மேலே நடக்க வழியை விட்டனர்.
வள்ளுவரின் சாபத்தைக் கேட்ட இறைவன் சிரித்தான். ‘அடடா, என்ன கருணை நெஞ்சம், தெய்வப் புலவருக்கு!’
அருகிலிருந்த அன்னையைப் பார்த்துக் கண் சிமிட்டினான். மதுரையில் பொற்றாமரை ஏறிய ‘பொய்யில் புலவன்’ சாபம் கொடுத்து விட்டான், தேவியே! அதை சிரமேற்கொண்டு நிறைவேற்ற வேண்டாமா?”
தேவியும் சிரித்தாள்.
“வைகை தான் பெருக்கோடுகிறது. வந்தியோ அழைக்கிறாள். பிட்டுக்காவது மண் சுமந்து உங்கள் திருவிளையாடலைத் தொடங்குங்களேன்!”
பத்தே பத்து -‘யாதெனின்’ குறள்கள்!
பத்து, நூறு, ஆயிரம் அறிஞர்களும் நூல்களும் சேர்ந்தாலும் விளக்க முடியாத அரிய கருத்துக்கள்,
இல்லையா?
குறள் வாழ்க! தமிழ் வாழ்க!! குறள் நெறி வாழ்வோர் எவரானாலும் எங்கிருந்தாலும் வாழ்க!

Pic Source : https://yt3.ggpht.com/-catKsUhbaus/AAAAAAAAAAI/AAAAAAAAAAA/qRobNTCS-go/s900-c-k-no/photo.jpg
****************

குறள் தெளிவு

வள்ளுவராலும் பதில் சொல்ல முடியாத கேள்வி!

.நாகராஜன்

மன்றம் கூடியது

சில நிமிடங்களில் ஊர் மன்றம் கூடி விட்டது! ஏன்?வள்ளுவர் வந்திருக்கிறாராம்!வள்ளுவர் வந்திருக்கிறாராம்!செய்தி அதிக வேகத்தில் பரவவே, பறக்கவே அனைவரும் ஊர் மன்றமான ஆலமரத்தடியில் கூடி விட்டனர். ஆலமரத்தைச் சுற்றியுள்ள மேடையில் அமர்ந்திருப்பவர் நிஜமாகவே வள்ளுவர் தான்!அவரை வணங்கினர்; தொழுதனர்; கை கட்டி, வாய் மூடி உற்றுப் பார்த்து தங்களின் தரிசன பாக்கியத்தை நினைத்து மகிழ்ந்தனர்.

இன்று முழித்த வேளை நல்ல வேளை!மெதுவாக ஊர்ப் பெரியவர் ஒருவர் எழுந்தார். ‘பெரிசு’ ஏதாவது பொருள் பொதிந்த ஒன்றைத் தான் கேட்கும்! அனைவரும் ‘பெரிசையும்’ அதற்கு வள்ளுவர் என்ன சொல்லப் போகிறார் என்பதையும் ஆவலுடன் எதிர் நோக்கினர்.அப்போது கூட்டமாகக் கூடி இருக்கும் கூட்டத்தைப் பார்த்து பிச்சை எடுக்கும் வறியவன் ஒருவனும் ஓரமாக வந்து நின்றான்.

பத்துக் கேள்விகள்

பெரியவர் கேட்டார்: “வள்ளுவரே! வணக்கம். உங்கள் அருளை நாடி நிற்கிறோம். அருள் அல்லாதது யாது?வள்ளுவர் அவரைக் கனிவுடன் நோக்கினார். பின்னர் கூறினார்:-

“அருள் அல்லது யாதெனின் கொல்லாமை கோறல்

பொருள் அல்லது அவ்வூன் தினல்             (குறள் 254)

ஒரு கேள்வி; அதற்கு அற்புதமாக இரண்டு விஷயங்களைப் பதிலாகப் பெற முடிந்தது. ஒரு உயிரையும் கொல்லாமல் இருப்பதே அருள்; அந்த மாமிசத்தை வாங்கித் தின்னுவதே பொருள் அற்றது.ஊர் மக்கள் சைவ உணவை மட்டும் உண்ணத் தீர்மானித்து விட்டனர்.

ஒரு கேள்வி கேட்டு பதிலும் வந்ததால் அடுத்தவர் மெல்ல எழுந்தார்.“வாய்மை எனப்படுவது யாது?”

“வாய்மை எனப்பதுவது யாதெனின் ..

யாதெனின்?!“யாதொன்றும் தீமை இலாத சொலல்”   (குறள் 291)

ஆஹா! எளிமையான சுருக்கமான சூத்திரமாக இருக்கிறதே! பிற உயிருக்குத் தீமை பயக்காத சொற்களைச் சொல்லுவதே வாய்மை!மூன்றாமவர் எழுந்தார்:-“ அறவினை யாது?”

“அறவினை யாதெனின் கொல்லாமை கோறல்

பிறவினை எல்லாம் தரும்”            (குறள் 321)

தான் முதலில் சொன்னதை மீண்டும் வலியுறுத்தி வள்ளுவர் கூறியதை அனைவரும் பக்தியுடன் மனதில் குறித்துக் கொண்டனர். பிற உயிரைக் கொல்லாமல் இருப்பதே அறவினை. அப்படிக் கொல்வோருக்கு அறமற்ற பிற தீவினைகள் சேரும்.கூட்டத்தில் அஹிம்சையைப் பின்பற்றுபவருக்கு ஒரே சந்தோஷம். மனதிற்குள் உருகினார்.

இன்னொருவர் கேட்டார்:- “நல் ஆறு யாது?”நல்ல வழி எது என்றா கேட்கிறீர்கள்?வள்ளுவர் கூறினார்:-

“நல் ஆறு எனப்படுவது யாதெனின்  யாதொன்றும்

கொல்லாமை சூழும் நெறி”    (குறள் 324)

அட, அதே கருத்து! திருப்பித் திருப்பி வலியுறுத்துகிறாரே! சொல் சிக்கனம் உடைய வள்ளுவர் ஆழ்ந்த கருத்தை வலியுறுத்தி, எந்த உயிரையும் கொல்லாமல் இருப்பதே நல் ஆறு என்கிறாரே!கையிலுள்ள பணம் சுருங்கக் கூடாது; குறையக் கூடாது என்ற கவலையில் இருந்தவர் கேட்டார்:- : செல்வத்திற்கு அஃகாமை யாது?

வள்ளுவர் சிரித்தார்:- “

அஃகாமை செல்வத்திற்கு யாதெனின்

வெஃகாமை வேண்டும் பிறன் கைப் பொருள்”   (குறள் 178)

பிறர் கைப்பொருளைக் கவரக் கூடாது என்று இருத்தலே தன் கைப்பொருள் சுருங்காமல் இருக்கும் வழி!மோசமான அரசியல்வாதிகள் எல்லாம் அங்கு தலையைக் குனிந்து கொண்டனர்.நண்பர்கள் இருவர் எழுந்தனர்: ஒருவர் கேட்டார்:-“நட்பிற்குச் சிறந்த நிலை யாது?”பதில் உடனே வந்தது:

“நட்பிற்கு வீற்றிருக்கை யாதெனின் கொட்பின்றி ஒல்லும் வாய் ஊன்றும் நிலை”   (குற:ள் 789)

நட்பிற்கு வீற்றிருக்கை – சிறந்த நிலை – மாறுபாடின்றி முடிந்த போதெல்லாம் உதவி செய்து தாங்கிக் கொண்டிருப்பதே ஆகும்.அடுத்த நண்பர் பளிச்சென்று உடனே கேட்டார்:-“பழைமை எனப்படுவது யாது?”

“பழைமை எனப்படுவது யாதெனின் யாதும்

கிழமையைக் கீழ்ந்திடா நட்பு”    (குறள் 801)

பழகிய நட்பு, அதாவது பழைமை எனப்படுவது யாதெனில் பழகிய நண்பர் உரிமையாய் செய்யும் எந்தச் செயலையும் அவமதிக்காது ஏற்றுக் கொள்வதேயாகும்.நண்பர்கள் இருவரும் மகிழ்ந்தனர்.அடுத்தவர் எழுந்தார்: “பேதைமை என்பது யாது?”“பேதைமை அதாவது அறியாமை யாது என்று தானே கேட்கிறீர்கள்?

பேதைமை என்பதொன்று யாதெனின்

ஏதங்கொண்டு ஊதியம் போக விடல்    (குறள் 831)

அறியாமை என்று சொல்லப்படுவது யாதென்றால், தனக்குக் கேடு விளைவிப்பனவற்றைக் கைக்கொண்டு நன்மை தருபனவற்றைக் கை நழுவி விடச் செய்வதாகும்!இன்னொருவர் எழுந்தார்:-“ வெண்மை எனப்படுவது யாது?”

“வெண்மை எனப்படுவது யாதெனின் ஒண்மை

உடையம் யாம் என்னும் செருக்கு” (குறள் 844)

வெண்மை அதாவது புல்லறிவு – கீழான அறிவு எதுவெனில் யாம் நிறைந்த அறிவு உடையோம் என்று தம்மைத் தாமே மதித்துக் கொண்டிருக்கும் செருக்கு-  அகம்பாவம் – தான்!

கூட்டத்தினர் அகம் மிக மகிழ்ந்தனர். எத்தனை ‘யாதெனின்?’ கேள்விகள். அத்தனைக்கும் உடனுக்குடன் பதில்!

வள்ளுவர் எட்டிப் பார்த்தார். ஓரத்தில் இருந்த பிச்சைக்காரன் முண்டியடித்துக் கொண்டு முன்னே வந்தான்.

வள்ளுவர் அவனுக்கு வழி விடுமாறு சைகை காட்டவே அனைவரும் ஒதுங்கினர்.அவன் முன்னே வந்தான். “ஐயா! வணக்கம். இன்மையின் இன்னாதது யாது?”தான் எடுக்கும் இந்த பிச்சையை விடக் கொடியது ஏதாவது இருக்கிறதா?மனம் கலங்கி இருக்கும் அவனைப் பார்த்த வள்ளுவர் எழுந்தார். அனைவரும் எழுந்தனர்.

இன்மையின் இன்னாதது யாதெனின்..

அனைவரும் வள்ளுவரையே கவனித்தனர். இன்மையின் இன்னாதது யாதெனின்..யாதெனின்..வள்ளுவராலும் பதில் சொல்ல முடியாத கேள்வி என்று கூட ஒன்று உண்டா, என்ன?யாதெனின் என்ன, வள்ளுவர் தடுமாறுகிறார். உடனுக்குடன் பதில் அளித்த வள்ளுவரா, யோசிக்கிறார், தடுமாறுகிறார், பதிலுக்காகத் தவிக்கிறார்.

கூட்டம் வியந்தது; பிரமித்தது.தன் நிலையை அடைந்த வள்ளுவர் கூறினார்:-

“இன்மையின் இன்னாதது யாதெனின் இன்மையின்

இன்மையே இன்னா தது”    (குறள் 1041)

வறுமையை விடக் கொடியது என்னவென்றால்,..   என்னவென்றால் .. வறுமையைப் போலக் கொடியது வறுமையே தான்!வள்ளுவரும் கலங்கி நின்றதைப் பார்த்த மன்றமே கலங்கியது.பிச்சைக்காரன் கண்ணைத் துடைத்துக் கொண்டான்.

வள்ளுவரின் சாபம்

வள்ளுவர் சற்று உரத்த குரலில் கூறினார்:-

“இரந்தும் உயிர் வாழ்தல் வேண்டின்

பரந்து கெடுக உலகியற்றியான்” (குறள் 1062)

பிச்சை எடுத்தும் உயிர் வாழுமாறு சிலரைப் படைத்திருந்தால் அந்த உலகை இயற்றியவன் அதே போல பிச்சை எடுத்து அலைந்து திரியட்டும்!பிச்சைக்காரனின் தோள் மீது கையைப் போட்டுக் கொண்டார் வள்ளுவர். அனைவரும் அவர் மேலே நடக்க வழியை விட்டனர்.வள்ளுவரின் சாபத்தைக் கேட்ட இறைவன் சிரித்தான். ‘அடடா, என்ன கருணை நெஞ்சம், தெய்வப் புலவருக்கு!’

அருகிலிருந்த அன்னையைப் பார்த்துக் கண் சிமிட்டினான். மதுரையில் பொற்றாமரை ஏறிய ‘பொய்யில் புலவன்’ சாபம் கொடுத்து விட்டான், தேவியே! அதை சிரமேற்கொண்டு நிறைவேற்ற வேண்டாமா?”தேவியும் சிரித்தாள்.“வைகை தான் பெருக்கோடுகிறது. வந்தியோ அழைக்கிறாள். பிட்டுக்காவது மண் சுமந்து உங்கள் திருவிளையாடலைத் தொடங்குங்களேன்!”

பத்தே பத்து -‘யாதெனின்’ குறள்கள்!

பத்து, நூறு, ஆயிரம் அறிஞர்களும் நூல்களும் சேர்ந்தாலும் விளக்க முடியாத அரிய கருத்துக்கள், இல்லையா?

குறள் வாழ்க! தமிழ் வாழ்க!! குறள் நெறி வாழ்வோர் எவரானாலும் எங்கிருந்தாலும் வாழ்க!

Pic source : https://pbs.twimg.com/media/C2NKNeqUAAAJhA9.jpg

****************